مجلة وفاء wafaamagazine
أكّد رئيس التيّار الوطني الحرّ جبران باسيل في كلمة له خلال المؤتمر الوطني الثامن ان “نحنا منبقى 14 آذار لمّا الكل بينسوه لأنّو الحريّة والسيادة والاستقلال مزروعين بجيناتنا الوطنية ولأنّو التحرير ما بيكمل الاّ بتحرّر اللبنانيين ودولتهم من ثنائية الفساد والتسلّط”.
ورأى باسيل أن “لبنان الكيان والوطن والدولة والنموذج والرسالة بخطر ووجودنا كلنا كلبنانين بخطر اذا استمرّينا متمترسين بمواجهة بعضنا ورافضين الحوار كطريق للخلاص. بلبنان ما في اغلبيّة نيابية لفريق لوحده وما رح تكون ولا يوم. مجبورين نتحاور ونتّفق، ولازم نطلع من تخوين بعضنا لأن ما في حل الاّ بالاتفاق”.
وأضاف: “بديل الحوار هو العنف، وحتى العنف بيخلص بالحوار. الاّ اذا واحد فكره يقضي على التاني، وما فيها جماعة بلبنان تفني جماعة تانية”.
وتاب: “وقفُ العدّ لا يكون بالكلام والتهويل بل بالقانون الأرثوذكسي بمجلس النواب وبمجلس الشّيوخ إذا تمّ إنشاؤه وبالدولة المدنية وبإلغاء الطائفية بالكامل وبقيام اللامركزية الموسعة”.
ولفت باسيل الى أن “عصب التيار عم يقوى اكتر، بقضيّته ومبادئه. يلّي خايفين تجي الحلول على حسابنا، ويمشوا بالـ Deal بلانا بقلّن ان محاولة عزل التيار أحسن وصفة لتقويته، ولكن نتيجتها عاطلة عالوطن، لأن بناء الدولة رح يفشل من دوننا. هيك، منرجع على المعارضة الواضحة بالكامل، وهيك بتخدمونا!”.
وشدد على ان “معركة الاصلاح الزامية ومش ترف سياسي. لأن نحنا جماعة ما منقدر نعيش الاّ ضمن الدولة. الفساد والدولة ما بيتعايشوا، في واحد بيقضي على التاني”.
وتابع: “جيل بكامله عم يربى على فكرة انّو واحد متل رياض سلامة مش معقول يتحاكم او يتوقّف، متلما بإيامنا سيطرت فكرة انّو مش معقول يتحرّر لبنان. شباب لبنان اليوم فاقدين الأمل، بوقتها نحنا ما فقدناه وتحرّر لبنان وطلاّبنا هلّق ما رح يفقدوه ورح يتحاكم الحاكم”.
